Ras deui nyawang alam ka tukang. Inget ka Agus Gustiwa nu geus nganteur kuring leuwih miresep kana seni Sunda. Dimana ilaing ayeuna Gus? Minangka tilam kasono ti kuring; ieu salah sahiji lagu favorit urang duaan "Serat Salira", masih inget keneh? Sigana mah moal, sabab ilaing leuwih inget ka sindenna si "Walet" (sabenerna sarua kuring ge). Tah ayeuna ku kuring dihaleuangkeun deui, engke iraha-iraha disusul ku "Lalaki Raheut Hatena". Ieu haleuang muga nepi ka ilaing, oge Jasa, Tatang, Wawan, Yayat, Yono, Sudar, pokona kum sakabeh nu baheula daek rajeun milu ka gunung. Mangga atuh mugi katampi ....
Serat Salira
Serat salira, wengi tadi tos katampi
kantenan jungjunan, kantenan mungguh éwuhna
disangki serat katresna, sabudeureun cinta urang
geuningan lepat dugaan, mundut mundur pipisahan
Serat salira dina jajaran kalima
unggelna teu wasa, mun kedah midua haté
teu sapuk sareng aturan, sok sieun teu kabadanan
cangcaya moal laksana, mendak bagja sasarengan
Teu nanaon jungjunan, teu nanaon
mun kitu kapalay salira
lelembutan ngajerit nungkupan diri
teungteuingeun téga téh kamalinaan
Nu munggaran urang tepung luhur panggung
sutra genas nu nyacas kiwari kantun ngahelas
imut-imut nu kamari, teuteup surti nu kamari
Ayeuna duka kumaha, pajar urang pileuleuyan
Tidak ada komentar:
Posting Komentar